ரூ.5 லட்சம் சொந்த நிதியில் அரசுப்பள்ளியை மேம்படுத்த களமிறங்கிய கிராம மக்கள்: முன்மாதிரியாக திகழும் பள்ளியை பார்வையிட்டு ஆலோசனை

புதுக்கோட்டை: புதுக்கோட்டை மாவட்டம் ஆலங்குடி  அருகே பனசக்காடு அரசுத்தொடக்கப்பள்ளியை ரூ.5 லட்சம் சொந்த நிதியில் மேம்படுத்த முடிவு செய்த கிராம மக்கள், முன்மாதிரியாக திகழும் புள்ளாச்சிகுடியிருப்பு அரசுப்பள்ளியை திங்கள்கிழமை பார்வையிட்டு,ஆலோசனை மேற்கொண்டனர்.

   ஆலங்குடி அருகேயுள்ள கொத்தமங்கலம் ஊராட்சிக்கு உள்பட்ட பனசக்காடு அரசு தொடக்கப்பள்ளியை மேம்படுத்துவதற்கு கிராம மக்கள் முடிவு செய்தனர். அதற்கான ஆலோசனைக்கூட்டம் பள்ளி வளாகத்தில் ஞாயிற்றுக்கிழமை மாலை நடைபெற்றது. கூட்டத்துக்கு, அரசு மருத்துவர் எஸ்.அருள் தலைமை வகித்தார்.லெ.அடைக்கலம், ஆனந்தன் ஆகியோர் முன்னிலை வகித்தனர். கூட்டத்தில், பள்ளி, அங்கன்வாடி கட்டடத்தின் சேதமடைந்த பகுதிகளை சீரமைத்து,வர்ணம் பூசி,  இரு வகுப்பறைகளையும் ஏசி வசதியுடன் ஸ்மார்ட் வகுப்பறையாக மாற்றுவது, மாணவர்கள் அமர்ந்து சாப்பிடும் வகையில்  கட்டடம் கட்டுவது, விளையாட்டு உபகரணங்கள், கணினிகள்,சோலார் இன்வெர்ட்டர், குடிநீர் வசதிகளை மேம்படுத்துவது என்பன உள்ளிட்ட பணிகளை சொந்த நிதி, கொடையாளர்களின் உதவியுடன் மேற்கொள்வது. மேலும், பள்ளிக்கு சுற்றுச்சுவர், பேவர்பிளாக் தளம், சிறுவர் பூங்கா உள்ளிட்டவைகளை அரசுநிதி மூலம் பெறுவதற்கு முயற்சிகள் மேற்கொள்வது என்பன உள்ளிட்ட தீர்மானங்கள் கூட்டத்தில் நிறைவேற்றப்பட்டன.தொடர்ந்து,பள்ளியின் வளர்ச்சிப் பணிகளை மேற்கொள்ள திட்டமிட்ட கிராமத்தினர், இதுபோன்று பள்ளியை ஏற்கனவே ஸ்மார்ட் வகுப்பறையுடன், பேவர் பிளாக் தளம், கலையரங்கம் உள்ளிட்ட வசதிகளுடன் மேம்படுத்தி முன்மாதிரியாக திகழும் புள்ளாச்சி குடியிறுப்பு அரசுத்தொடக்கப்பள்ளியை பனசக்காடு பள்ளியின் ஆசிரியைகள், கிராம மக்கள், பெற்றோர்கள் திங்கள்கிழமை பார்வையிட்டனர். பள்ளியின் தோற்றம் , ஸ்மார்ட் வகுப்பறையை பார்வையிட்டு, அப்பள்ளியின் ஆசிரியர்கள், பெற்றோர் ஆசிரியர் கழகத் தலைவர் சுரேஷ் உள்ளிட்டோரை சந்தித்து, பள்ளியில் மேற்கொள்ளப்பட்டுள்ள பணிகள், செலவீனங்கள், வசதிகள், அரசு நிதி பெறும் வழிமுறைகள் உள்ளிட்டவைகள் குறித்து ஆலோசனை மேற்கொண்டனர்.

கால் நூற்றாண்டு பாதை பிரச்சினைக்கு தீர்வு:கோட்டாட்சியருக்கு பொதுமக்கள் பாராட்டு

புதுக்கோட்டை: புதுக்கோட்டை மாவட்டம் கறம்பக்குடி அருகே கால் நூற்றாண்டாக இருந்த வந்த பாதை பிரச்சினைக்கு தீர்வு கண்ட புதுக்கோட்டை கோட்டாட்சியர் முருகேசனை அப்பகுதி பொதுமக்கள் பாராட்டினர்.
  கறம்பக்குடி வட்டம் அம்புக்கோவில் ஊராட்சியில் கண்டியன்பட்டி ஆதிதிராவிடர் தெரு உள்ளது. இங்கிருந்து கல்லாக்கோட்டை ஊராட்சியில் உள்ள ஆண்டான் தெரு வரை சுமார் 2.5 கிலோ மீட்டருக்கு பாதை ஆக்கிரமிக்கப்பட்டு இருந்தது. வேளாண் விளை பொருட்களை கொண்டு செல்லவும், மயானத்துக்கு செல்லவும் இப்பகுதியினர் மிகுந்த சிரமத்தைச் சந்தித்து வந்தனர். பாதையில் உள்ள ஆக்கிரமிப்புகளை அகற்றித் தர வேண்டும் என பல முறை அரசுக்கு கோரிக்கை விடுத்தும், அவ்வப்போது போராட்டங்களை நடத்தியும்கூட தீர்வில்லை.
இந்நிலையில், இதுதொடர்பாக புதுக்கோட்டை கோட்டாட்சியர் முருகேசனிடம் அப்பகுயினர் அண்மையில் கோரிக்கை மனுவை அளித்தனர். இது குறித்து சம்பந்தப்பட்டோரை அழைத்து பேச்சுவார்த்தை நடத்தினார். அதில், தீர்வு ஏற்படவில்லை.

இந்நிலையில், கோட்டாடஅசியர் முருகேசன் முன்னிலையில் போலீஸார் பாதுகாப்புடன்  பொக்லைன் இயந்திரங்களைக் கொண்டு சுமார் 2.5 கிலோ மீட்டருக்கு ஆக்கிரமிப்பு அகற்றப்பட்டது. கால் நூற்றாண்டாக நீடித்து வந்த பாதை பிரச்சினைக்கு தீர்வு கண்ட புதுக்கோட்டை கோட்டாட்சியர் முருகேசனை அப்பகுதியினர் வெகுவாக பாராட்டினர்.

தொடர் மழையால் நீர்வரத்து அதிகரிப்பு: செம்பரம்பாக்கம், புழல் ஏரிகளில் இருந்து வினாடிக்கு 100 கன அடி நீர் திறப்பு:

தொடர் மழையால் நீர்வரத்து அதிகரித்துள்ள நிலையில் செம்பரம்பாக்கம், புழல் ஏரிகளில் இருந்து தண்ணீர் திறக்கப்பட்டுள்ளது. சென்னை மற்றும் புறநகர் பகுதிகளில் கடந்த சில நாட்களாக தொடர்ந்து கன மற்றும் மிதமான மழை பெய்து வருகிறது. இதனால் சென்னை நகர மக்களுக்கு குடிநீர் வழங்கும் புழல் மற்றும் செம்பரம்பாக்கம் ஏரிகள் முழு கொள்ளளவை எட்டி வருகின்றன. இந்நிலையில், இன்று காலை முதல் ஆங்காங்கே கனமழையும், மிதமான மழையும் பெய்து வருகிறது. இன்று காலை நிலவரப்படி, செம்பரம்பாக்கம் ஏரியில் மொத்த கொள்ளளவான 24 அடியில், தற்போது 20.65 அடியாக நீர் இருப்பு உள்ளது.

புழல் ஏரியில் மொத்த கொள்ளளவான 3300 மில்லியன் கன அடியில், தற்போது 2692 மில்லியன் கன அடி நீர் நிரம்பியுள்ளது. இதைத்தொடர்ந்து, இன்று காலை முதல் புழல், செம்பரம்பாக்கம் ஏரிகளில் நீர்வரத்து அதிகரிக்கும்போது, முதல் கட்டமாக மாலை 100 கனஅடி உபரி நீரை வெளியேற்றும்படி மாவட்ட கலெக்டர்கள் ஆர்த்தி, ஆல்பி ஜான் வர்க்கீஸ் ஆகியோர் உத்தரவிட்டுள்ளனர். அதன் அடிப்படையில் செம்பரம்பாக்கம் புழல் ஏரிகளில் இருந்து தலா 100 கன அடி தண்ணீர் திறக்கப்பட்டுள்ளது. மேலும் உபரி நீர் வரத்து அதிகரிப்புக்கு ஏற்ப வெளியேற்றப்படும் நீரின் அளவை அதிகரிகத்து கொள்ளலாம் என பொதுப்பணி மற்றும் நீர்வளத்துறை அதிகாரிகள் முடிவு செய்துள்ளனர்.

4 மாவட்டங்களில் கூட்டுறவு ரேஷன் கடைகளுக்கு 1043 ஊளியர்கள் நேரடியாக நியமனம்-ஆன்லைனில் விண்ணப்பிக்க வேண்டும்:

   விண்ணப்பங்கள் இணையதளம் வழியாக பெறப்படுகின்றன. நவம்பர் 14-ம் தேதி மாலை 5.45 மணிக்குள் விண்ணப்பிக்க அவகாசம் கொடுக்கப்பட்டுள்ளது.

கூட்டிறவு சங்கங்கள் மூலம் நடத்தப்படும் நியாயவிலைக்கடைகளில் விற்பனையாளர் மற்றும் கட்டுனர் பணியிடங்கள் காலியாக உள்ளன. அந்த இடங்களை நிரப்ப கூட்டுறவு துறை அமைச்சர் ஐ.பெரியசாமி நடவடிக்கை எடுத்துள்ளார். அதன் அடிப்படையில் சென்னை, காஞ்சிபுரம், திருவள்ளூர், செங்கல்பட்டு மாவட்டங்களில் உள்ள ரேசன் கடைகளுக்கு ஊழியர்கள் தேர்வு செய்யப்படுகிறார்கள்.

4 மாவட்டங்களிலும் மொத்தம் 1043 பேர் பணியில் நியமிக்கப்பட இருக்கிறார்கள். இந்த பணிகளுக்கு குறைந்தபட்ச கல்வி தகுதி, வயது வரம்பு, இட ஒதுக்கீடு விண்ணப்ப கட்டணம் போன்ற விவரங்கள் மாவட்ட ஆள் சேர்ப்பு நிலைய இணையதளத்தில் வெளிடப்பட்டு உள்ளன.

சென்னை மாவட்டத்தில் 48 விற்பனையாளர்கள் 296 கட்டுனர் பணியிடங்கள், காஞ்சிபுரம் மாவட்டத்தில் 114 விற்பனையாளர், 160 கட்டுனர்கள், செங்கல்பட்டு மாவட்டத்தில் 157 விற்பனையாளர் 21 கட்டுனர்கள், திருவள்ளூர் மாவட்டத்தில் 198 விற்பனையாளர்கள், 39 கட்டுனர் பணியிடங்கள் நேரடியாக நிரப்பப்படுகின்றன.

விண்ணப்பங்கள் இணையதளம் வழியாக பெறப்படுகின்றன. அடுத்த மாதம் (நவம்பர்) 14-ந் தேதி மாலை 5.45 மணிக்குள் விண்ணப்பிக்க அவகாசம் கொடுக்கப்பட்டுள்ளது. அதற்கான அறிவிப்பு இன்று வெளியிடப்பட்டுள்ளது.

அமெரிக்காவில் டிரம்ப் ஆதரவாளர்கள் வன்முறை: துப்பாக்கி சூட்டில் 4 பேர் பலி

அமெரிக்கா நாடாளுமன்றக் கட்டிடத்தை முற்றுகையிட்டு, அதற்குள் நுழைய முயன்ற அதிபர் டிரம்ப் ஆதரவாளர்களுக்கும், போலீசாருக்கும் இடையே  ஏற்பட்ட மோதலில் ஒரு பெண் உள்பட்ட 4 பேர் துப்பாக்கிச்சூட்டில் பலியானார்கள். ஏராளமானோர் காயமடைந்தனர். ஆதரவாளர்கள் நடத்திய தாக்குதலில் போலீசாரும் காயமடைந்தனர்.

டிரம்ப்பின் ஆதரவாளர்கள் போலீஸார் மீது தாக்குதல் நடத்த ரசாயன ஆயுதங்களையும், பைப் வெடிகுண்டு, துப்பாக்கி ஆகியவற்றை வைத்திருந்தார்கள். தற்காப்பு நடவடிக்கையாக போலீசார் துப்பாக்கிச்சூடு நடத்தினர் என போலீஸ் உயர் அதிகாரி ஒருவர் தெரிவித்தார்.

கடந்த நவம்பர் மாதம் அமெரிக்காவில் நடந்த அதிபர் தேர்தலில், ஜனநாயகக் கட்சியின் அதிபர் வேட்பாளர் ஜோ பைடன் வெற்றி பெற்றார். வரும் 20-ந் தேதி முறைப்படி அமெரிக்காவின் 46-ஆவது அதிபராக ஜோ பிடன் பதவி ஏற்க உள்ளார். இந்நிலையில், ஜோ பிடனின் வெற்றியை அங்கீகரிக்கும் வகையில் சான்றிதழ் அளிக்கும் நிகழ்ச்சி நடாளுமன்றத்தில்  நடந்தது. இதனால் நாடாளுமன்றத்தைச் சுற்றி பலத்த பாதுகாப்பு ஏற்பாடுகள் செய்யப்பட்டு இருந்தன.

அப்போது அமெரிக்க நாடாளுமன்றம் நோக்கி அதிபர் டிரம்ப்பின் ஆதரவாளர்கள் ஆயிரக்கணக்கானோர் திரண்டு வந்தனர். அவர்களை நாடாளுமன்றத்துக்குள் நுழைய விடாமல் போலீசார் தடுத்தபோது, போலீசாருக்கும், டிரம்ப்பின் ஆதரவாளர்களுக்கும் இடையே தள்ளு முள்ளு ஏற்பட்டது.

இதனால் கூட்டத்தைக் கலைக்கும் வகையில் போலீசார் கண்ணீர் புகைக் குண்டுகளை வீசியும், தடியடி நடத்தியும் கூட்டத்தினரைக் கலைத்தனர். இதனால், போலீசாருக்கும், போராட்டக்காரர்களுக்கும் இடையே மோதல் ஏற்பட்டது. இதில் ஏராளமான போலீசார் காயமடைந்து, மருத்துவமனைக்குக் கொண்டுச் செல்லப்பட்டனர்.

அதிபர் டிரம்ப்பின் ஆதரவாளர்கள் கையில் ஆயுதங்களுடனும், சிலர் துப்பாக்கிகளுடன் இருந்து போலீசாரைத் தாக்கினர். இதனால், கூட்டத்தைக் கலைக்கவும், தற்காப்புக்காகவும் போலீசார் துப்பாக்கிச்சூடு நடத்தினர். இதில் ஒரு பெண் உயிரிழந்தார், 3 பேர் படுகாயமடைந்தனர். துப்பாக்கிச்சூட்டில் காயமடைந்த 3 பேரும் மருத்துவமனைக்குக் கொண்டுச் செல்லும் வழியில் உயிரிழந்தனர்.

இது குறித்து, வாஷிங்டன் டிசி போலீஸ் தலைவர் ராபர்ட் கான்டி கூறுகையில்  நாடாளுமன்றத்துக்குள் நுழைய முயன்ற போராட்டக்காரர்கள் மீது நடத்தப்பட்ட துப்பாக்கிச்சூட்டில் 4 பேர் உயிரிழந்தனர்.நாடாளுமன்றத்தை முற்றுகையிட்டு ஒரு மணி நேரத்துக்கும் மேலாக ஆதரவாளர்கள் போராட்டம் நடத்துவதைப் பார்த்த அதிபர் டிரம்ப் அமைதியாகக் கலைந்து செல்லுங்கள் என்று வேண்டுகோள் விடுத்தார்.

கலைந்து செல்லுங்கள்-டிரம்ப் வேண்டுகோள்

அதிபர் டிரம்ப் ட்விட்டரில் பதிவிட்ட கருத்தில்  நாடாளுமன்றத்தை முற்றுகையிட்டுள்ள அனைவரும் அமைதியாக கலைந்து செல்லுங்கள். வன்முறை வேண்டாம். நினைவில் கொள்ளுங்கள், சட்டம் ஒழுங்கிற்கு நமது கட்சிதான் பொறுப்பு. சட்டத்தை மதித்து கலைந்து செல்லுங்கள். போலீசாருக்கும், சட்டத்துக்கும் மதிப்பு கொடுங்கள். அமைதியாக இருங்கள்” எனத் தெரிவித்தார்.

பார்லிமெண்ட்டை முற்றுகையிட்ட டிரம்ப் ஆதரவாளர்கள் செயலைப் பார்த்து அதிபராக பதவி ஏற்க இருக்கும் ஜோ பிடன் அதிர்ச்சி அடைந்தார். அமெரிக்க மக்களுக்கு ஜோ பிடன் ஆற்றிய உரையில்  இந்த நேரத்தில் அமெரிக்க ஜனநாயகம் எப்போதுமில்லாத தாக்குதலைச் சந்தித்துள்ளது. இந்த நவீன காலத்தில் இதுபோன்ற சம்பவத்தை பார்த்தது இல்லை. பார்லிமெண்ட்டின் மீதும், சுதந்திரத்தின் மீது நடத்தப்பட்ட தாக்குதல். மக்கள் பிரதிநிதிகள் மீதான தாக்குதல், அவர்களைப் பாதுக்காக்க வேண்டும் என்றார்.

இந்த குழப்பமும், போராட்டமும் அமெரிக்காவை ஒருபோதும் பிரதிபலிப்பதில்லை என்பதை தெளிவாகக் கூறுகிறேன். நாம் யார் என்பதை இது பிரதிநிதித்துவப்படுத்தவில்லை. சிறிய அளவிலான குழுவினர் மட்டுமே சட்டத்தை மீறுகிறார்கள். இது எதிர்ப்பு அல்ல. ஒழுங்கின்மை, குழப்பம். இது முடிவுக்கு வர வேண்டும் என்று வேண்டுகோள் விடுத்தார்.

கொரோனா தடுப்பூசி இல்லை: பொதுமக்கள் காவல்துறையினருடன் வாக்குவாதத்தில் ஈடுபட்டதால் பரபரப்பு.

ஈரோடு ஜுன்: கொரோனா தடுப்பூசி இல்லை எனக்கூறி பொதுமக்கள் காவல்துறையினருடன் வாக்குவாதத்தில் ஈடுபட்டதால் பரபரப்பு

தமிழகத்தில் கொரோனா 2-ஆம் அலையின் தாக்கம் மிக வேகமாக பரவி வருகிறது. இதனை கட்டுப்படுத்த சுகாதாரத்துறை பல்வேறு தடுப்பு நடவடிக்கைகளை மேற்கொண்டு வருகிறது. மேலும் அரசு மற்றும் குறிப்பிட்ட சில தனியார் மருத்துவ மனைகளில் கோவிட்ஷீல்ட் மற்றும் கோவாக்சின் ஆகிய தடுப்பூசிகள் போடப்பட்டு வருகிறது.

இந்நிலையில் தமிழகத்தில் கொரோனா தடுப்பூசி கிடைப்பதில்லை என பொதுமக்கள் குற்றம்சாட்டி வருகின்றனர் அதன் ஒருபகுதியாக ஈரோடு மாநராட்சிக்குட்பட்ட மரப்பாலம் அருகேயுள்ள சி.எஸ்.ஐ துவக்கப்பள்ளியில் கொரோனா தடுபபூசி கிடைக்கவில்லை என அப்பகுதி மக்கள்  அங்கு பாதுகாப்பு பணியிலிருந்த  காவல்துறையினருடன் வாக்குவாதத்தில் ஈடுபட்டனர்.

தகவலறிந்து சம்பவ இடத்திற்கு வந்த அதிகாரிகள் கூடிய விரைவில் தடுப்பூசி வழங்க ஏற்பாடு செய்வதாக தெரிவித்தனர். இதனால் அப்பகுதியில் சிறிது நேரம் பரபரப்பு ஏற்பட்டது.

புதுக்கோட்டை பொற்பனைக்கோட்டை ஸ்ரீ முனீஸ்வரர் கோயிலில் குருபெயர்ச்சி வழிபாடு

புதுக்கோட்டை நகரின் கிழக்குப்பகுதியில் காவல் தெய்வமாக அருள்பாலித்துவரும் பொற்பனைக் கோட்டை ஸ்ரீ முனீஸ்வரர் கோயிலில்  குருபெயர்ச்சி மற்றும் ஐப்பசி மாத  நிறைவு மண்டகப்படி விழா (15.11.2020)நடைபெற்றது.

குருபெயர்ச்சியை முன்னிட்டு  ஸ்ரீ முனீஸ்வரர் சுவாமிக்கு  பால், தயிர், பஞ்சாமிர்தம், பன்னீர், இளநீர் உள்ளிட்ட  புண்ணிய தீர்த்த அபிஷேகம் நடைபெற்றது. மேலும், முனீஸ்வரருக்கு  வடைமாலை மற்றும் மலர் அலங்காரத்துடன்  தீபாராதனை  நடைபெற்றது.

விழாவில், புதுக்கோட்டை, ஆலங்குடி, திருவரங்குளம் சுற்று வட்டாரப் பகுதிகளைச் சேர்ந்த பக்தர்கள் வருகைதந்து     தரிசனம் செய்தனர். அனைவருக்கும் அருட்பிரசாதம் வழங்கப்பட்டது. ஏற்பாடுகளை, இந்துசமயஅறநிலையத்துறை நிர்வாகத்தினர் மற்றும்  பழனியப்பன் பூசாரி தலைமையிலான விழாக்குழுவினர் செய்தனர்.