மேற்பனைக்காடு வீரமாகாளியம்மன் கோயில் பாளையெடுப்புத் திருவிழா

புதுக்கோட்டை: புதுக்கோட்டை மாவட்டம், கீரமங்கலம் அருகேயுள்ள மேற்பனைக்காடு வீரமாகாளியம்மன் கோயில் பாளையெடுப்புத் திருவிழா புதன்கிழமை நடைபெற்றது.

 கீரமங்கலம் அருகேயுள்ள பிரசித்தி பெற்ற வீரமாகாளியம்மன் கோயில் திருவிழா கடந்தவாரம் காப்புக் கட்டுதலுடன் தொடங்கியது. தொடர்ந்து, கோயிலில் தினசரி அம்மனுக்கு சிறப்பு அபிஷேக ஆராதனைகளும் அம்மனே வீதியுலா நிகழ்ச்சியும் நடைபெற்றுவந்தன.கடந்த வாரம் முளைப்பாரித் திருவிழாவும் நடைபெற்றது. திருவிழாவின் முக்கிய நிகழ்ச்சியான பாளையெடுப்புத் திருவிழா புதன்கிழமை நடைபெற்றது. இதையொட்டி, அப்பகுதி பெண்கள் குடங்களில் நெல்மணிகளை நிரப்பி, தென்னம்பாளைகளை வைத்து மலர்களால் அலங்கரித்த குடங்களை சுமந்தவாறு வாணவேடிக்கைகள், மேளதாளங்கள் முழங்க ஊர்வலமாகச்சென்று கோயிலை அடைந்தனர். தொடர்ந்து, கோயில் அருகே தென்னம்பாளைகளை வைத்துவிட்டு சிறப்பு வழிபாட்டில் ஈடுபட்டனர். தொடர்ந்து, அம்மனுக்கு பல்வேறு திரவிய அபிஷேக ஆராதனைகள் நடைபெற்றன.

 திருவிழாவில், மேற்பனைக்காடு, செரியலூர், கீரமங்கலம் உள்ளிட்ட பகுதிகளைச் சேர்ந்த ஏராளமானோர் கலந்துகொண்டனர். கீரமங்கலம் போலீஸார் பாதுகாப்பு பணிகளை மேற்கொண்டனர்.

செய்தியாளர் தாக்கப்பட்டதைக் கண்டித்து: புதுக்கோட்டையில் பத்திரிகையாளர் சங்கத்தினர் ஆர்ப்பாட்டம்

புதுக்கோட்டை:திருப்பூர் மாவட்டம், பல்லடம் நியூஸ் 7 செய்தியாளர் மீது நடத்தப்பட்ட கொலைவெறித் தாக்குதலைக் கண்டித்து புதுக்கோட்டை மாவட்ட பத்திரிகையாளர் சங்கத்தினர் சனிக்கிழமை ஆர்ப்பாட்டத்தில் ஈடுபட்டனர்.

புதுக்கோட்டை பேருந்து நிலையம் அருகே புதுக்கோட்டை மாவட்ட பத்திரிகையாளர் சங்கத் தலைவர் சு.மதியழகன் தலைமையில் நடைபெற்ற ஆர்ப்பாட்டத்தில்,திருப்பூர் மாவட்டம், பல்லடம் நியூஸ் 7 செய்தியாளர் நேசபிரபு மீது நடத்தப்பட்ட கொலைவெறித்தாக்குதலை கண்டித்தும், தாக்குதலில் ஈடுபட்டவர்கள் மீது கடும் நடவடிக்கை எடுக்க  வலியுறுத்தியும், அரசும், காவல்துறையும் செய்தியாளர்களின் பாதுகாப்பை உறுதி செய்ய வேண்டுமென வலியுறுத்தி முழக்கங்கள் எழுப்பினர்.

புதுக்கோட்டை மாவட்ட பத்திரிகையாளர் சங்கச்செயலர் சா.ஜெயப்பிரகாஷ், பொருளாளர் கே.சுரேஷ் உள்ளிட்டோர் கண்டன உரையாற்றினர்.

கறம்பக்குடி அருகே குடிநீர் கோரி கிராம மக்கள் சாலை மறியல்

புதுக்கோட்டை: புதுக்கோட்டை மாவட்டம், கறம்பக்குடி அருகே குடிநீர் வழங்க வலியுறுத்தி கிராம மக்கள்  சாலை மறியலில் ஈடுபட்டனர்.

 கறம்பக்குடி அருகேயுள்ள செங்கமேடு ஊராட்சி கண்ணுத்தோப்பு கிராமத்தில் சுமார் 300-க்கும் மேற்பட்ட குடும்பத்தினர் வசித்துவருகின்றனர். அவர்களுக்கு அப்பகுதியில் உள்ள மேல்நிலைநீர்தேக்கத் தொட்டி மூலம் குடிநீர் விநியோகிக்கப்பட்டு வந்துள்ளது. இந்நிலையில், அந்த மேல்நிலைநீர்தேக்க தொட்டியின் மின்மோட்டார் சிலமாதங்களு்கு முன்பு பழுதாகியுள்ளது. அதனால், அப்பகுதி மக்களுக்கு குடிநீர் விநியோகம் தடைபட்டுள்ளது. இதுகுறித்து பலமுறை ஊராட்சி நிர்வாகத்திடம் முறையிட்டும் நடவடிக்கை எடுக்கவில்லையாம்.இதனால், அப்பகுதி மக்கள் உடனே குடிநீர் வழங்க வலியுறுத்தி, காலிக்குடங்களுடன் கறம்பக்குடி ஊராட்சி ஒன்றிய அலுவலகம் அருகே சாலை மறியலில் ஈடுபட்டனர். தொடர்ந்து, அவர்களிடம் ஒன்றிய அலுவலர்கள், கறம்பக்குடி போலீஸார் பேச்சுவார்த்தை நடத்தி குடிநீர் வழங்க உரிய நடவடிக்கை எடுப்பதாக அளித்த உறுதியளிப்பை ஏற்று போராட்டத்தில் ஈடுபட்டோர் கலைந்து சென்றனர்.இந்த மறியல் போராட்டத்தால் கறம்பக்குடி-புதுக்கோட்டை சாலையில் சுமார் 1 மணி நேரம் போக்குவரத்து பாதிக்கப்பட்டது.

தான் பயின்ற அரசுப்பள்ளிக்கு ரூ.1 லட்சத்தில் நலத்திட்ட உதவிகள் வழங்கிய ஆசிரியர்

புதுக்கோட்டை: புதுக்கோட்டை மாவட்டம், ஆலங்குடி அருகே தான் பயின்ற அரசுப்பள்ளிக்கு ரூ.1 லட்சம் மதிப்பிலான நலத்திட்ட உதவிகளை புதன்கிழமை அரசுப்பள்ளி ஆசிரியர் வழங்கினார்.

புதுக்கோட்டை மாவட்டம் ஆலங்குடி  அருகேயுள்ள அரையப்பட்டியைச் சேர்ந்தவர் தி.குணசேகரன். இவர் வல்லத்திராகோட்டை அரசு மேல்நிலைப்பள்ளியில் இயற்பியல் ஆசிரியராகவும், உதவித் தலைமை ஆசிரியராகவும் பணியாற்றி வருகிறார். இவர் அரசுப் பள்ளிகளில் பயிலும் ஏழை, எளிய மாணவர்களுக்கு தொடர்ந்து பல்வேறு உதவிகளைச் செயது வருகிறார். இதற்காக பல்வேறு அமைப்புகள் சார்பில் 22  விருதுகள் வழங்கி அவரை சிறப்பித்துள்ளனர்.
 இந்நிலையில், அரையப்பட்டி அரசு மேல்நிலைப்பள்ளியில் முன்னாள் மாணவரான முறையில் அந்தப்பள்ளியில் படிக்கும் அத்தனை மாணவர்களக்கும் சுமார் 30 ஆயிரம் மதிப்பிலான புத்தகங்களை  ஆசிரியர் குணசேகரன் புதன்கிழமை வழங்கினார். மேலும், ரூ.10 ஆயிரம் மதிப்பிலான மணி ஒலிப்பான், ரூ.15 ஆயிரம் மதிப்பில்  மேசைகள், மாணவர்களுக்கு மாலை நேர சிற்றுண்டிக்கா க ரூ.50 ஆயிரம் என ரூ.1 லட்சம் மதிப்பிலான உதவியை குணசேகரன் வழங்கினார்.

இந்நிகழ்ச்சியில் பெற்றோர் ஆசிரியர் கழகத்தலைவர் எஸ்.ஆர்.வடிவேலு, கல்விக்குழுத் தலைவர் ச.சிங்காரம், பள்ளித் தலைமை ஆசிரியர் பாண்டியன் உள்ளிட்டோர் பங்கேற்றனர்.

எல்லாருக்கும் எல்லாமும் என்ற அடிப்படையில் செயல்படுவேன்: கரூர் மாவட்ட ஆட்சியர் பிரபுசங்கர் பேட்டி

கரூர், ஜூன்: கரூர் ஆட்சித்தலைவராக டாக்டர்.த.பிரபுசங்கர்  புதன்கிழமை பொறுப்பேற்றார்.கரூர் மாவட்ட ஆட்சியர் அலுவலகத்தில் நடைபெற்ற நிகழ்வில் மாவட்ட ஆட்சியராக பொறுப்பேற்றுக் கொண்டார்.

பின்னர் செய்தியாளர்களிடையே ஆட்சியர் மேலும். கூறியதாவது:  கரூர் மாவட்டத்தின் ஆட்சியராக (16.6.2021) பொறுப்பேற் றுள்ளேன். தமிழக முதலமைச்சர் புதிதாகப் பொறுப்பேற்றுள்ள  ஆட்சித்தலைவர்கள் செய்ய வேண்டிய பணிகள் குறித்து அறிவுரைகள் வழங்கியுள்ளார்கள்.

துாங்காமை கல்வி துணிவுடைமை இம்மூன்றும்

நீங்கா நிரனால் பவர்க்கு - வள்ளுவப் பெருந்தகையின் வாக்குக்கு ஏற்ப நிர்வாகத்தை செம்மையான முறையில் கரூர் மாவட்ட மக்களுக்கு வழ்ங்குவதையே எனது தலையாய கடமையாக  எனது செயல்பாடுகள் இருக்கும்.

பொதுமக்களின் குறைகளை உடனுக்குடன் சீரிய முறையில் தீர்ப்பதற்கு அனைத்து துறைகளையும் ஒருங்கிணைத்து செயல்படும் நிலை உருவாக்கப்படும். மாவட்டத்திற்கு ஒருங்கிணைந்த வளர்ச்சி என்ற நோக்கத்தில் நான் செயல்படுவேன்.

ஒருங்கிணைத்துஅனைத்து தரப்பு மக்களுக்கும்  மாவட்ட வளர்ச்சிக்குத் தேவையான திட்டங்கள் செயல்படுத்தியும், மாவட்டத்தின்  வேளாண்மை, தொழில்துறை, சுகாதாரத்துறை    பல்வேறு துறைகளை ஒருங்கிணைத்து திட்டங்களை செயல்படுத்துவதில் மின்சாரம், மதுவிலக்கு மற்றும் ஆயத்தீர்வை அமைச்சர் அவர்களின் வழிகாட்டுதலோடு தனிக்கவனம் செலுத்தப்படும். மேலும், மாவட்டத்தில் அதிக அளவில் மரக்கன்றுகள் நட்டு வளர்க்கும் திட்டம் செயல்படுத்தப்படும்.

உலகையே அச்சுறுத்திக் கொண்டிருக்கும் கொரோனா இரண்டாவது அலை  முதல்வரின் போர்க்கால  நடவடிக்கைகளால்   தமிழ்நாட்டில்  கட்டுக்குள் கொண்டுவரப்பட்டுள்ளது. அதே போல கரூர் மாவட்டமும்  கொரோனா தொற்று கட்டுக்குள் உள்ளது. இனி  கொரோனா தொற்று இல்லாத  மாவட்டமாக உருவாக்க உரிய நடவடிக்கைகள் முன்னெடுப்பதே தற்போது என்னுடைய தலையாய பணியாக இருக்கும்.

இந்த நேரத்தில் பொதுமக்களுக்கு வேண்டுகோளாக, தெரிவிக்க விரும்புவது என்னவென்றால், அனைவரும் அரசின் வழிகாட்டி நெறிமுறைகளை முறையாக கடைபிடித்து, கொரோனா தொற்று தடுப்பூசிகளை செலுத்திக்கொண்டு முறையான முன்னெச்சரிக்கை நடவடிக்கைகளை ஒவ்வொருவரும் கடைபிடித்தால் கொரோனா தொற்று இல்லாத மாவட்டமாக கரூர் மாவட்டத்தை உருவாக்கலாம் என்றார் ஆட்சியர் பிரபுசங்கர்.

இந்நிகழ்வின் போது, மாவட்ட அலுவலர் எம்.லியாகத், கரூர் வருவாய் கோட்டாட்சியர் பாலசுப்பிரமணியன் உள்ளிட்ட அலுவலர்கள் உடனிருந்தனர்..

செல்போன் மூலம் 30 நிமிடங்களில் கொரோனா பரிசோதனை மேற்கொள்ளும் தொழில் நுட்பம் கண்டுபிடிப்பு

வாஷிங்டன்: கொரோனா  நோய்த்தொற்று பரிசோதனையை செல்போன் வாயிலாக 30 நிமிடங்களில் மேற்கொள்வதற்கான தொழில் நுட்பத்தை அமெரிக்க விஞ்ஞானிகள் உருவாக்கியுள்ளனர்.

கொரோனா நோய்த்தொற்று பாதிப்பைக் கண்டறிவதற்கு நோய் எதிர்பொருள் (ஆன்டிஜென்) துரித பரிசோதனைக் கருவியும், அந்நோய்த்தொற்று பாதிப்பை உறுதி செய்வதற்கு ஆர்டி பிசிஆர் பரிசோதனைக் கருவியும் பயன்படுத்தப்பட்டு வருகிறது ஆர்டி பிசிஆர் பரிசோதனைக் கருவியின் மூலம் கரோனா நோய்த்தொற்று பாதிப்பை உறுதி செய்வதற்குக் குறைந்தபட்சம் ஒன்றரை மணி நேரம் ஆகும்.

இத்தகைய சூழலில், கிரிஸ்பர் (crisper) தொழில்நுட்பத்தின் வாயிலாக 30 நிமிடங்களுக்குள் கொரோனா  நோய்த்தொற்று பரிசோதனை முடிவை அறிந்து கொள்வதற்கான வழிமுறைகளை விஞ்ஞானிகள் உருவாக்கியுள்ளனர். இது தொடர்பாக விஞ்ஞானிகள் கூறுகையில், புதிய தொழில்நுட்பத்தின் அடிப்படையில் உருவாக்கப்பட்ட கருவியில் கொரோனா வைரஸின் ஆர்என்ஏ- ஏற்கெனவே உள்ளீடு செய்யப்பட்டிருக்கும். குறிப்பிட்ட நபரிடமிருந்து பெறப்பட்ட மாதிரியானது செல்லிடப்பேசியுடன் இணைக்கப்பட்டுள்ள கருவியின் மூலமாகப் பரிசோதனை செய்யப்படும்

அந்த மாதிரியில் கொரோனா வைரஸ் இருப்பதற்கேற்ப அதன் ஒளிரும் தன்மையை செல்லிடப்பேசி கேமரா மூலமாகக் கண்டறியலாம். அந்நோய்த்தொற்று பாதிப்பின் தீவிரத்தையும் இந்தக் கருவி மூலமாகக் கண்டறிய முடியும்,  கொரோனா  பாதிப்பு அதிகமாக இருந்தால், மாதிரி  அதிகமாக ஒளிரும். அரை மணி நேரத்துக்குள் முடிவுகளைத் தெரிந்து கொள்ளலாம்.

சிஏஎஸ்-13 என்ற  புரதம்  இந்த பரிசோதனைக்கருவியில் பயன்படுத்தப்படுகிறது. இந்தப்புரதமானது கொரோனா வைரஸின் ஆர்என்ஏ மரபணுவைக்கண்டறியும் பணியை மேற்கொள்ளும். இதன் மூலம்  கொரோனா வைரஸ் தொற்றை துரிதமாக கண்டறிய முடியும்.

கிரிஸ்பர் தொழில் நுட்பத்தைக் கண்டறிந்ததற்காக 2020-ஆண்டுக்கான வேதியியல் நோபல்  பரிசை வென்ற ஜெனிபர் டூட்னா கூறுகையில், கிரிஸ்பர் தொழில்நுட்பத்தில்  டிஎன்ஏ மரபணுவை ஆர்என்ஏ மரபணுவாக  மாற்றுவதன் மூலமே நோய்த்தொற்று பரிசோதனையை மேற்கொள்ள முடியும்.

இதன் காரணமாக கால விரயம் ஏற்படும். ஆனால், கிரிஸ்பரைக் கொண்டு உருவாக்கப்பட்டுள்ள தொழில்நுட்பத்தின் மூலம் ஆர்என்ஏ- மரபணுவை நேரடியாகக் கண்டறிவதன் மூலம் துரிதமாக  முடிவுகளை அறிந்து கொள்ளலாம் என்றார்.

புதுக்கோட்டை மாவட்டம், மேற்பனைக்காட்டில் ரூ.75 லட்சத்தில் சுயஉதவிக்குழு கட்டிடத்திற்கு அமைச்சர் விஜயபாஸ்கர் அடிக்கல்

புதுக்கோட்டை, பிப்: புதுக்கோட்டை மாவட்டம், அறந்தாங்கி ஊராட்சி ஒன்றியம், மேற்பனைக்காட்டில்  ரூ.75 லட்சத்தில் புதிதாக கட்டப்படவுள்ள சுயஉதவிக்குழு கட்டடத்திற்கு  சுகாதாரத்துறை அமைச்சர் சி. விஜயபாஸ்கர் அடிக்கல் நாட்டினார்

இதையடுத்து அமைச்சர் கூறியதாவது: பொதுமக்களின் முன்னேற்றத்திற்காக எண்ணற்ற  நலத்திட்டங்களை தமிழக அரசு செயல்படுத்தி வருகிறது. அந்த வகையில் புதுக்கோட்டை மாவட்டம் முழுவதும் வளர்ச்சித்திட்டப் பணிகள் தொடர்ந்து மேற்கொள்ளப்பட்டு வருகிறது.மேற்பனைக்காடு கிராமத்தில் மகாத்மாகாந்தி தேசிய ஊரக வேலை உறுதித்திட்டத்தின் கீழ் ரூ.75 லட்சம் மதிப்பீட்டில் புதிதாக கட்டப்படவுள்ள சுயஉதவிக்குழு கட்டடத்திற்கு அடிக்கல் நாட்டப்பட்டுள்ளது.

இந்த சுயஉதவிக்குழு கட்டிடப் பணிகள் முடிவடைந்து பயன்பாட்டிற்கு வரும்பொழுது பொதுமக்கள் தங்களது இல்லங்களில் நடைபெறும் சுப நிகழ்ச்சிகளை நடத்தலாம். இதேபோன்று இப்பகுதி பொதுமக்களுக்கு பேருந்து வசதி, குடிநீர் மின்விளக்கு  போன்ற பல்வேறு வசதிகள் நிறைவேற்றப்பட்டுள்ளது. 

தமிழகத்தில் கூட்டுறவு வங்கிகளில் கடன்பெற்ற விவசாயிகளின் கடன் தொகை முழுவதும் தள்ளுபடி செய்யப்படும் என முதல்வர் அறிவித்தார். புதுக்கோட்டை மாவட்டத்திலுள்ள  கூட்டுறவு கடன்களும் தள்ளுபடி செய்யப்பட்டு விவசாயிகள் பயன்பெற உள்ளனர்.

மேலும் புதுக்கோட்டை மாவட்ட மக்களின்  நீண்ட நாள் கோரிக்கையினை ஏற்று காவிரி வைகை - குண்டாறு இணைப்புத்திட்டம் நிறைவேற்றப்பட உள்ளது. இத்திட்டம் நிறைவேற்ற படும்பொழுது புதுக்கோட்டை மாவட்டம் செழிப்பான மாவட்டமாக மாறும். மேலும் இப்பகுதி பொதுமக்களின் அனைத்து கோரிக்கைகளும் நிறைவேற்ற உரிய நடவடிக்கை மேற்கொள் ளப்படும் என்றார் சுகாதாரத்துறை அமைச்சர் டாக்டர் சி.விஜயபாஸ்கர்.

இந்நிகழ்ச்சியில்  மாவட்ட வருவாய் அலுவலர் பெ.வே.சரவணன், சார் ஆட்சியர் ஆனந்த் மோகன், அறந்தாங்கி எம்எல்ஏ  இ.ஏ.இரத்தினசபாபதி உள்ளிட்டோர்  பங்கேற்றனர்..