சிங்கப்பூரில் பணியின்போது மின்னல் தாக்கி இளைஞர் உயிரிழப்பு

புதுக்கோட்டை: சிங்கப்பூரில் பணியின்போது மின்னல் தாக்கி புதுக்கோட்டை மாவட்டம் வடகாடு பகுதி இளைஞர் உயிரிழந்த சம்பவம் அப்பகுதி மக்களிடையே சோகத்தை ஏற்படுத்தியுள்ளது.

 புதுக்கோட்டை மாவட்டம் ஆலங்குடி அருகேயுள்ள வடகாடு ஊராட்சி சேர்வைகாரன்பட்டியைச் சேர்ந்த மதியழகன் மகன் செந்தூரன்(25).தொழிற்கல்வி படித்துள்ள இவர், குடும்ப சூழ்நிலை காரணமாக கடந்த 5 மாதங்களுக்கு முன்பு சிங்கப்பூருக்கு வேலைக்கு சென்றுள்ளார். அங்கு உள்ள கட்டுமான நிறுவனம் ஒன்றில் வேலைபார்த்து வந்துள்ளார். இந்நிலையில், திங்கள்கிழமை கட்டடத்தில் வேலை பார்த்தேக்கொண்டிருந்தபோது மின்னல் தாக்கி செந்தூரன் சம்பவ இடத்திலே உயிரிழந்தார். இதுகுறித்து சிங்கப்பூரில் செந்தூரன் வேலைபார்த்து வந்த நிறுவனத்தினர் அலைபேசி மூலம்  அவரது குடும்பத்தினருக்கு தகவல் தெரிவித்துள்ளனர்.இதைக்கேட்டு அதிர்ச்சியடைந்த பெற்றோர், உறவினர்கள் பெருந்துயரடைந்துள்ளனர். செந்தூரன் உயிரிழப்பு குறித்து உரிய விசாரணை நடத்தி இழப்பீடு பெற்றுத்தருவதோடு, அவரது உடலை சொந்த ஊருக்கு கொண்டுவர அரசு நடவடிக்கை எடுக்க வேண்டுமென செந்தூரன் குடும்பத்தினர் கோரிக்கை விடுத்துள்ளனர்.குடும்ப சூழலுக்காக வெளிநாடு வேலைக்கு சென்று இளைஞர் மின்னல் தாக்கி உயிரிழந்த சம்பவம் அப்பகுதி மக்களிடையே சோகத்தை ஏற்படுத்தியுள்ளது.

கீரமங்கலத்தில் பிரமாண்ட சிவன் சிலை தடாக சுவர் சேதம்: சீரமைக்க கோரிக்கை

புதுக்கோட்டை: புதுக்கோட்டை மாவட்டம் கீரமங்கலத்தில் சேதமடைந்துள்ள பிரமாண்ட சிவன் சிலை  தடாகச்சுவற்றை சீரமைத்துர வேண்டுமென அப்பகுதி மக்கள் கோரிக்கை விடுத்துள்ளனர்.

 கீரமங்கலத்தில் பழமை வாய்ந்த ஒப்பிலாமணி உடனுறை மெய்நின்றநாதர் கோயில் உள்ளது.இக்கோயிலில் சுமார் 10 ஆண்டுகளுக்கு முன்னர் கோயில் முன்புள்ள  குளத்தின்  நடுவில் 82 அடி உயர பிரமாண்ட சிவன் சிலை அமைக்கப்பட்டுள்ளது. மேலும், சுற்றுச்சுவர், தடுப்புச்சுவர், நடைபாதை அமைக்கப்பட்டது.

கோயிலுக்கு வரும் பக்தர்கள் நடை பாதை வழியாக சிவன் சிலையை சுற்றிப் பார்ப்பதுடன், தினசரி நூற்றுக்கணக்கானோர் நடைப்பயிற்சிக்காகவும் வந்து செல்கின்றனர்.மேலும், சிவராத்திரி உள்ளிட்ட தினங்களில் ஏராளமானோர்  கிரிவலம் செல்கின்றனர்.

இந்நிலையில்,  உரிய பராமரிப்பு இல்லாததால் மழையால் தடாகச்சுவற்றில் விரிசல் ஏற்பட்டு சாய்ந்து விடும் நிலையில் உள்ளது.

நடை பாதை மற்றும் தடாகத்தின் சுற்றுச்சுவர் சேதமடைந்துள்ளதால் பக்தர்கள் அச்சத்துடனேயே சிவன் சிலையை சுற்றி வருகின்றனர்.

மேலும், தற்போது பருவமழை தொடங்கியுள்ளதால் குளத்தின் தடுப்புவர் மேலும் விரிசல் ஏற்படத் தொடங்கியுள்ளதால் உடனே சேதமடைந்த சுவற்றை சீரமைத்துத்தர நடவடிக்கை எடுக்க வேண்டும் என அப்பகுதி மக்கள் கோரிக்கை விடுத்துள்ளனர்.

(படம்)கீரமங்கலத்தில் மெய்நின்றநாதர் கோயிலில் அமைக்கப்பட்டுள்ள பிரமாண்ட சிவன்சிலை

செரியலூர் கறம்பக்காடு முத்துமாரியம்மன் கோயில் தேரோட்டம்

புதுக்கோட்டை மாவட்டம் கீரமங்கலம் அருகேயுள்ள செரியலூர் கறம்பக்காடு முத்துமாரியம்மன் கோயில் தேரோட்டம் திங்கள்கிழமை மாலை நடைபெற்றது‌.

கீரமங்கலம் அருகேயுள்ள பிரசித்தி பெற்ற செரியலூர் கறம்பக்காடு முத்துமாரியம்மன் கோயில் திருவிழா கடந்த வாரம் காப்புக் கட்டுதலுடன் தொடங்கியது.தொடர்ந்து, மண்டகபடிதாரர்கள் சார்பில் கோயிலில் தினசரி அம்மனுக்கு சிறப்பு அபிஷேக ஆராதனைகள், வீதியுலா நிகழ்ச்சியும் நடைபெற்று வந்தன‌.திருவிழாவின் முக்கிய நிகழ்ச்சியான தேரோட்டம் திங்கள்கிழமை மாலை நடைபெற்றது. இதையொட்டி, சிறப்பு அலங்காரத்தில் காட்சியளித்த அம்மனை அலங்கரிக்கப்பட்ட தேரில் எழுந்தருளச் செய்து தேரோடும் வீதிகள் வழியே ஏராளமானோர் தேரை இழுத்து வந்தனர்.இதில் செரியலூர் கறம்பக்காடு, கீரமங்கலம் உள்ளிட்ட மாவட்டத்தின் பல்வேறு பகுதிகளில் இருந்து ஏராளமானோர் கலந்து கொண்டனர்.கீரமங்கலம் போலீஸார் பாதுகாப்பு பணிகளை மேற்கொண்டனர்.

கறம்பக்குடி அருகே 1 டன் ரேசன் அரிசி பறிமுதல்: ஒருவர் கைது

புதுக்கோட்டை:புதுக்கோட்டை மாவட்டம், கறம்பக்குடி அருகே ரேசன் அரிசியை பதுக்கி வைத்து விற்பனையில் ஈடுபட்டவரை புதன்கிழமை போலீஸார் கைது செய்தனர்.

 கறம்பக்குடி அருகேயுள்ள வெட்டன்விடுதி பகுதியில் ரேசன் அரிசி பதுக்கி வைக்கப்பட்டு அதிக விலைக்கு விற்பனை நடைபெறுவதாக கிடைத்த தகவலைத் தொடர்ந்து, புதுக்கோட்டை மாவட்ட குடிமைப் பொருள் வழங்கல் குற்றப் புலனாய்வுத்துறை காவல் உதவி ஆய்வாளர் கார்த்திக் தலைமையிலான போலீஸார் அப்பகுதியில் தீவிர கண்காணிப்பில் ஈடுபட்டனர். அப்போது, வெட்டன்விடுதி பூக்காரத் தெருவைச் சேர்ந்த எஸ்.ஆனந்தகுமார்(45) என்பவரது வீட்டில் 22 மூட்டைகளில் சுமார் 1 டன் ரேசன் அரிசி பதுக்கி வைக்கப்பட்டிருந்தது தெரியவந்தது. தொடர்ந்து, அரிசி மூட்டைகள், பதிவு எண் இல்லாத மொபட் ஆகியவற்றை பறிமுதல் செய்ததோடு, ஆனந்தகுமாரை கைது செய்து விசாரணை மேற்கொண்டுவருகின்றனர்.

ஐந்து மாநில சட்டப்பேரவைத் தேர்தல் அட்டவணை விவரம்: தேர்தல் ஆணையம் அறிவிப்பு

 தமிழகம், புதுச்சேரி, கேரளம், அசாம், மேற்கு வங்கம் ஆகிய ஐந்து மாநிலங்களுக்கான  சட்டப்பேரவை தேர்தல் அட்டவணையை தலைமைத் தேர்தல் ஆணையர் சுநீல் அரோரா  வெளியிட்டுள்ளார்.

அதன்படி, தமிழகம், புதுச்சேரி, கேரளத்துக்கு ஏப்ரல் 6-ஆம் தேதி செவ்வாய்க்கிழமை ஒரே கட்டமாக சட்டப் பேரவைத் தேர்தலுக்கான வாக்குப்பதிவு நடைபெறும் என்று தலைமைத்தேர்தல் ஆணையர் சுநீல் அரோரா அறிவித்துள்ளார்.

தமிழகத்தில் மொத்தமுள்ள 234 தொகுதிகளுக்கும்  புதுச்சேரியில் 30 தொகுதிகளுக்கும் கேரளத்தில் 140 தொகுதிகளிலும் ஒரே கட்டமாக ஏப்ரல் 6-ஆம் தேதி தேர்தல் நடைபெற உள்ளது.

தமிழகம், புதுச்சேரி, கேரளம்- மூன்று மாநிலங்களிலும்,

வேட்பு மனு தாக்கல் மார்ச் 12-ஆம் தேதி தொடங்கும்.

வேட்பு மனு தாக்கல் செய்ய மார்ச் 19 கடைசி நாள். 

வேட்பு மனுக்கள் மீதான பரிசீலனை மார்ச் 20-ஆம் தேதி நடைபெறும்.

வேட்பு மனுவை திரும்பப் பெற மார்ச் 22 கடைசி நாள்.

ஏப்ரல் 6-ஆம் தேதி தமிழகம், கேரளம், புதுச்சேரி ஆகிய மூன்று மாநிலங்களிலும் ஒரே கட்டமாக வாக்குப்பதிவு நடைபெறும். மே 2-ஆம் தேதி மூன்று மாநிலங்களிலும் பதிவாகும் வாக்குகள் எண்ணப்பட்டு, அன்றைய தினமே முடிவுகள் அறிவிக்கப்படும்.

அசாம் சட்டப்பேரவைத் தேர்தல் 

அசாம் மாநிலத்துக்கு 3 கட்டங்களாக சட்டப்பேரவைத் தேர்தல் நடைபெறும் என்று தலைமைத் தேர்தல் ஆணையர் சுநீல் அரோரா தெரிவித்துள்ளார்.

மார்ச் 27-ல் முதல் கட்ட வாக்குப்பதிவு நடைபெறும்.  இரண்டாம் கட்ட வாக்குப்பதிவு ஏப்ரல் 1-ஆம் தேதியும், மூன்றாம் கட்டமாக ஏப்ரல் 6-ம் தேதி வாக்குப்பதிவு நடைபெறும் என்று அறிவிக்கப்பட்டுள்ளது. மூன்று கட்டமாக நடைபெறும் தேர்தலில் பதிவாகும் வாக்குகள் அனைத்தும் மே 2-ஆம் தேதி எண்ணப்படும். அன்றைய தினமே தேர்தல் முடிவுகள் வெளியிடப்படும்.

மேற்கு வங்கத்தில் 8 கட்டங்களாக வாக்குப்பதிவு

மேற்குவங்க மாநிலத்தில் 8 கட்டங்களாக சட்டப்பேரவை தேர்தலுக்கான வாக்குப்பதிவு நடைபெறும் என அறிவிக்கப்பட்டுள்ளது. தமிழகத்தில் 234 தொகுதிகளிலும், புதுச்சேரியில் 30 தொகுதிகளிலும், கேரளத்தில் 140 தொகுதிகளிலும், மேற்கு வங்கத்தில் 294 தொகுதிகளிலும், அசாமில் 126 தொகுதிகளிலும் தேர்தல் நடைபெறவுள்ளது. அதில் மேற்குவங்க மாநிலத்தில் உள்ள 294 சட்டப்பேரவைத் தொகுதிகளுக்கு 8 கட்டங்களாக வாக்குப்பதிவு நடைபெறும் என்று அறிவிக்கப்பட்டுள்ளது.

முதல்கட்ட வாக்குப்பதிவு மார்ச் 27-ஆம் தேதியும்,இரண்டாம் கட்டமாக ஏப்ரல் 1-ஆம் தேதியும், மூன்றாம் கட்டமாக ஏப்ரல் 6-ஆம் தேதியும், நான்காம் கட்டமாக ஏப்ரல் 10-ஆம் தேதியும், ஐந்தாம் கட்டமாக ஏப்ரல் 17-ஆம் தேதியும், ஆறாம்  கட்டமாக ஏப்ரல் 22-ஆம் தேதியும்,ஏழாம் கட்டமாக ஏப்ரல் 26-ஆம் தேதியும், எட்டாவது மற்றும் இறுதி கட்டமாக ஏப்ரல் 29-ஆம் தேதியும் வாக்குப்பதிவு நடைபெற உள்ளது. வாக்கு எண்ணிக்கையானது, சட்டப்பேரவைத் தேர்தல் நடைபெறம் ஐந்து மாநிலங்களிலும் மே 2-ஆம் தேதி ஞாயிற்றுக்கிழமை நடைபெறவுள்ளது.

பெட்ரோல், டீசல் விலை உயர்வைக்கண்டித்து கரூரில் காங்கிரஸ் சார்பில் ஜோதிமணி எம்பி - தலைமையில் ஆர்ப்பாட்டம்

கரூர், ஜூன்:  மோடி அரசின் பெட்ரோல், டீசல்,சமையல் எரிவாயு விலை உயர்வை எதிர்த்து கரூரில் கரூர் நாடாளுமன்ற உறுப்பினர் செ.ஜோதிமணி  முன்னிலையில்,கரூர் மாவட்ட காங்கிரஸ் கமிட்டியின் தலைவர் சின்னசாமி  தலைமையில் வெள்ளிக்கிழமை  கண்டன ஆர்ப்பாட்டம் நடைபெற்றது.

ஆர்ப்பாட்டத்துக்கு பின்னர்  நாடாளுமன்ற உறுப்பினர் ஜோதிமணி அளித்த பேட்டி:   பெட்ரோல் டீசல் மற்றும் சமையல் எரிவாயு விலை ஏற்றத்தை கண்டித்து நாடெங்கும் பெட்ரோல் விற்பனை நிலையங்கள் முன்பு (ஜூன்11)  காங்கிரஸ் கட்சி போரட்டத்தில் ஈடுபட்டுவருகிறது.

நாட்டில் 135 நகரங்களில் பெட்ரோல் விலை 100 ரூபாயை தாண்டியிருக்கிறது. கொரொனாவின் பிடியில் மக்கள் சிக்கித்தவிக்கும் இந்த இக்கட்டான சூழ்நிலையில் நரேந்திர மோடி  அரசு இரக்கமற்று பெட்ரோல், டீசல் மற்றும் எரிவாயு விலையை உயர்த்திவருகிறது.

2013-14 -ஆமஆண்டில் சர்வதேச கச்சா எண்ணெய் விலை பேரலுக்கு 105 டாலர் ஆக இருந்தது. இன்று 72 டாலர் ஆக இருக்கிறது. எனினும் பெட்ரோல் டீசல் விலை மட்டும் தொடர்ந்து உயர்ந்து கொண்டே இருக்கிறது. கடந்த ஆண்டு கச்சா எண்ணெய் விலை பேரலுக்கு 16 டாலர்களாக குறைந்த போதும் விலை மட்டும் உயர்ந்து கொண்டேதான்இருக்கிறது.

கடந்த 13 மாதங்களில் பெட்ரோல் விலை 25.72 ரூ உயர்ந்து இருக்கிறது. டீசல் விலை 23.93 ரூ உயர்ந்திருக்கிறது. 2014 ஆம் ஆண்டில் காங்கிரஸ் ஆட்சியில் பெட்ரொலுக்கு ரூ.9.48 ஆக இருந்த கலால் வரி, தற்பொது ரூ.32.90 ஆக உயர்ந்துள்ளது. டீசலுக்கு 2014 ஆம் ஆண்டில் ரூ.3.56 ஆக இருந்த கலால் வரி, தற்பொது ரூ.31.80 ஆக உயர்ந்துள்ளது.

 இதன் மூலம் கடந்த 7 ஆண்டுகளில் மட்டும். 20 லட்சம் கோடி ரூபாய் வருமானம் மக்கள் வயிற்றில் அடித்து கொள்ளை யடித்திருக்கிறது மோடி  அரசால  கலால் வரி 459 விழுக்காடு உயர்த்தப்பட்டிருக்கிறது. ஆங்கிலேயர்களின் கொடுங்கோல் ஆட்சியில்கூட மக்களுக்கு இவ்வளவு வரி இருந்ததில்லை. பெட்ரோல் டீசல் மீது உலகிலேயே அதிகப்படியான வரி இந்தியாவில் மோடி ஆட்சியில்தான் விதிக்கப்பட்டிருக்கிறது.

இந்தியாவிடம் இருந்து பெட்ரோல் டீசல் இருக்குமதி செய்யும் பூட்டானில்கூட வரி குறைவாகதான் இருக்கிறது. இவ்வாறு பெறப்படும் கலால் வரியில் மாநில அரசுகளுக்கு பங்கில்லை என்பது குறிப்பிடத்தக்கது. மே மாதம் 4-ஆம் தேதி முதல் ஜூன் 11 வரை மட்டும் பெட்ரோல் டீசல் விலை 21 முறை ஏற்றப்பட்டிருக்கிறது.

இந்த பெருந்தொற்று காலத்தில் ஏற்கெனவே மக்கள் உயிருக்கும் வாழ்வாதாரத்திற்கும் போராடிவரும் நிலையில், மனிதாபி மானம் உள்ள எந்த ஒரு அரசாங்கமும் 21 முறை விலையேற்றத்தை செய்திருக்காது.

2013-14 ஆண்டு காங்கிரஸ் ஆட்சியில் 52,537 கோடியாக இருந்த பெட்ரோல் டீசல் வரி வருமானம், மோடி பதவியேற்ற ஒரு ஆண்டில் 72,000 கோடியாக உயர்ந்தது. 2014 முதல் 2018 -ஆம் ஆண்டு வரை 11 லட்சம் கோடி ரூபாயை வருமானமாக பெற்றிருக்கிறது. கடந்த 2020 ஆண்டில் மட்டும் 3,00,000 கோடி ரூபாய் வருமானமாக மக்களிடமிருந்து உரிஞ்சப்பட்டிருக்கிறது.

நம்மிடையே எழும் கேள்வி, இப்படி 7 ஆண்டுகளாக ஒன்றிய அரசின் கஜானாவுக்கு சென்றுள்ள 20 லட்சம் கோடி ரூபாய் எங்கே போனது? கடந்த ஆண்டு பொது முடக்கத்தின்போது காங்கிரஸ் கட்சி ஏழை எளிய நடுத்தர வர்க்க மக்களுக்கு மாதம் 7500 ரூபாயை 6 மாதங்களுக்கு வழங்குமாறு வலியுறுத்தினோம். அதற்கு மனம் வாவில்லை. கடுப்பூசி அனைவருக்கும் இலவசமாக கிடைப்பதற்கு போராடவேண்டியிருந்தது.

ஆனால் மக்கள் கட்டும் வரிப்பணம் எல்லாம் அதானி அம்பானி போன்ற பெருமுதலாளிகளுக்கு வரிச்சலுகையாக சென்றுவிடுகிறது. இப்படி அளிக்கப்படும் சலுகைகள் தேர்தல் பத்திரங்களாகவும், நன்கொடைகள் மூலமாகவும் மீண்டும் பாஜகவிடம் வந்து சேரும். அதனை ஊழல் மலிந்த பாரதிய ஜனதா கட்சி, எதிர்கட்சி ஆளும் மாநிலங்களில் எம்.எல்.ஏக்களை வாங்க பயன்படுத்துகிறது.

 பெட்ரோல் மற்றும் டீசல் விலை ஏற்றத்தால் பல்வேறு துறைகள் பாதிக்கப்படுகின்றன. குறிப்பாக வேலைவாய்ப்புகள் மிகுந்த ஆட்டொமொபைல் துறை மிகுந்த பாதிப்பை சந்தித்திருக்கிறது. 45 ஆண்டுகளில் இல்லாத வேலையின்மையை உருவாக்கிய மோடியின் அரசுக்கு இது பற்றி கவலையிருப்பதாக தெரியவில்லை. மேலும் எரிபொருள் விலை ஏற்றத்தால் உணவு உள்ளிட்ட அத்தியாவசிய பொருட்களின் விலையும் அதிகரிக்கும் நிலை ஏற்பட்டுள்ளது.

ஒன்றிய பாஜக அரசு உடனடியாக பெட்ரோல் டீசல் மற்றும் சமையல் எரிவாயு விலையேற்றத்தை திரும்பப்பெற வேண்டும். ஏழை எளிய நடுத்தர வர்க்க மக்களை சுரண்டும் மோடியின் தலைமையிலான ஆட்சியை எதிர்த்து, மக்களை காக்க காங்கிரன் கட்சி தொடர்ந்து போராடும். கொடுங்கோல் ஆட்சியை மக்கள் அடுத்த நாடாளுமன்ற தேர்தலில் நிச்சயம் தூக்கி எறிவார்கள் என்றார் எம்பி- ஜோதிமணி .

கோவில்களில் இரவு நேர காவலர்பணிக்கு முன்னாள் படைவீரர்கள் விண்ணப்பிக்கலாம்

புதுக்கோட்டை மாவட்டத்தில் உள்ள கோவில்களில்  இரவு நேர காவலர் பணியிடத்திற்கு முன்னாள் படைவீரர்கள் விண்ணப்பிக்கலாம் என  மாவட்ட ஆட்சியர் பி.உமாமகேஸ்வரி அறிவித்துள்ளார்.

புதுக்கோட்டை மாவட்டத்தில் தற்பொழுது 22 கோவில்களில் காலியாகவுள்ள இரவு நேர காவலர் பணியிடங்கள் முன்னாள் படைவீரர்களைக் கொண்டு நிரப்பப்பட உள்ளது. இதற்கு 62-வயதிற்கு  உட்பட்டவர்களாகவும், திடகாத்திரம் உள்ளவர்களாகவும் இருக்கும்  விருப்பம்   உள்ள  முன்னாள்  படைவீரர்கள்  தங்களது அசல் படைவிலகல் சான்று, அடையாள அட்டை ஆகியவற்றுடன் புதுக்கோட்டை மாவட்ட முன்னாள் படைவீரா; நல உதவி இயக்குநா;  அலுவலகத்தை நேரில் அணுகியோ அல்லது அஞ்சல் மூலமோ விண்ணப்பிக்கலாம்;.

மேலும் தொகுப்பூதியமாக ரூ.8000 வழங்கப்படும். தேவையான விவரங்களுக்கு புதுக்கோட்டை மாவட்ட முன்னாள் படைவீரர் நல அலுவலகத்தை அணுகலாம் என மாவட்ட ஆட்சியர் பி. உமாமகேஸ்வரி தெரிவித்துள்ளார்.