மேற்பனைக்காடு வீரமாகாளியம்மன் கோயில் பாளையெடுப்புத் திருவிழா

புதுக்கோட்டை: புதுக்கோட்டை மாவட்டம், கீரமங்கலம் அருகேயுள்ள மேற்பனைக்காடு வீரமாகாளியம்மன் கோயில் பாளையெடுப்புத் திருவிழா புதன்கிழமை நடைபெற்றது.

 கீரமங்கலம் அருகேயுள்ள பிரசித்தி பெற்ற வீரமாகாளியம்மன் கோயில் திருவிழா கடந்தவாரம் காப்புக் கட்டுதலுடன் தொடங்கியது. தொடர்ந்து, கோயிலில் தினசரி அம்மனுக்கு சிறப்பு அபிஷேக ஆராதனைகளும் அம்மனே வீதியுலா நிகழ்ச்சியும் நடைபெற்றுவந்தன.கடந்த வாரம் முளைப்பாரித் திருவிழாவும் நடைபெற்றது. திருவிழாவின் முக்கிய நிகழ்ச்சியான பாளையெடுப்புத் திருவிழா புதன்கிழமை நடைபெற்றது. இதையொட்டி, அப்பகுதி பெண்கள் குடங்களில் நெல்மணிகளை நிரப்பி, தென்னம்பாளைகளை வைத்து மலர்களால் அலங்கரித்த குடங்களை சுமந்தவாறு வாணவேடிக்கைகள், மேளதாளங்கள் முழங்க ஊர்வலமாகச்சென்று கோயிலை அடைந்தனர். தொடர்ந்து, கோயில் அருகே தென்னம்பாளைகளை வைத்துவிட்டு சிறப்பு வழிபாட்டில் ஈடுபட்டனர். தொடர்ந்து, அம்மனுக்கு பல்வேறு திரவிய அபிஷேக ஆராதனைகள் நடைபெற்றன.

 திருவிழாவில், மேற்பனைக்காடு, செரியலூர், கீரமங்கலம் உள்ளிட்ட பகுதிகளைச் சேர்ந்த ஏராளமானோர் கலந்துகொண்டனர். கீரமங்கலம் போலீஸார் பாதுகாப்பு பணிகளை மேற்கொண்டனர்.

செய்தியாளர் தாக்கப்பட்டதைக் கண்டித்து: புதுக்கோட்டையில் பத்திரிகையாளர் சங்கத்தினர் ஆர்ப்பாட்டம்

புதுக்கோட்டை:திருப்பூர் மாவட்டம், பல்லடம் நியூஸ் 7 செய்தியாளர் மீது நடத்தப்பட்ட கொலைவெறித் தாக்குதலைக் கண்டித்து புதுக்கோட்டை மாவட்ட பத்திரிகையாளர் சங்கத்தினர் சனிக்கிழமை ஆர்ப்பாட்டத்தில் ஈடுபட்டனர்.

புதுக்கோட்டை பேருந்து நிலையம் அருகே புதுக்கோட்டை மாவட்ட பத்திரிகையாளர் சங்கத் தலைவர் சு.மதியழகன் தலைமையில் நடைபெற்ற ஆர்ப்பாட்டத்தில்,திருப்பூர் மாவட்டம், பல்லடம் நியூஸ் 7 செய்தியாளர் நேசபிரபு மீது நடத்தப்பட்ட கொலைவெறித்தாக்குதலை கண்டித்தும், தாக்குதலில் ஈடுபட்டவர்கள் மீது கடும் நடவடிக்கை எடுக்க  வலியுறுத்தியும், அரசும், காவல்துறையும் செய்தியாளர்களின் பாதுகாப்பை உறுதி செய்ய வேண்டுமென வலியுறுத்தி முழக்கங்கள் எழுப்பினர்.

புதுக்கோட்டை மாவட்ட பத்திரிகையாளர் சங்கச்செயலர் சா.ஜெயப்பிரகாஷ், பொருளாளர் கே.சுரேஷ் உள்ளிட்டோர் கண்டன உரையாற்றினர்.

கறம்பக்குடி அருகே குடிநீர் கோரி கிராம மக்கள் சாலை மறியல்

புதுக்கோட்டை: புதுக்கோட்டை மாவட்டம், கறம்பக்குடி அருகே குடிநீர் வழங்க வலியுறுத்தி கிராம மக்கள்  சாலை மறியலில் ஈடுபட்டனர்.

 கறம்பக்குடி அருகேயுள்ள செங்கமேடு ஊராட்சி கண்ணுத்தோப்பு கிராமத்தில் சுமார் 300-க்கும் மேற்பட்ட குடும்பத்தினர் வசித்துவருகின்றனர். அவர்களுக்கு அப்பகுதியில் உள்ள மேல்நிலைநீர்தேக்கத் தொட்டி மூலம் குடிநீர் விநியோகிக்கப்பட்டு வந்துள்ளது. இந்நிலையில், அந்த மேல்நிலைநீர்தேக்க தொட்டியின் மின்மோட்டார் சிலமாதங்களு்கு முன்பு பழுதாகியுள்ளது. அதனால், அப்பகுதி மக்களுக்கு குடிநீர் விநியோகம் தடைபட்டுள்ளது. இதுகுறித்து பலமுறை ஊராட்சி நிர்வாகத்திடம் முறையிட்டும் நடவடிக்கை எடுக்கவில்லையாம்.இதனால், அப்பகுதி மக்கள் உடனே குடிநீர் வழங்க வலியுறுத்தி, காலிக்குடங்களுடன் கறம்பக்குடி ஊராட்சி ஒன்றிய அலுவலகம் அருகே சாலை மறியலில் ஈடுபட்டனர். தொடர்ந்து, அவர்களிடம் ஒன்றிய அலுவலர்கள், கறம்பக்குடி போலீஸார் பேச்சுவார்த்தை நடத்தி குடிநீர் வழங்க உரிய நடவடிக்கை எடுப்பதாக அளித்த உறுதியளிப்பை ஏற்று போராட்டத்தில் ஈடுபட்டோர் கலைந்து சென்றனர்.இந்த மறியல் போராட்டத்தால் கறம்பக்குடி-புதுக்கோட்டை சாலையில் சுமார் 1 மணி நேரம் போக்குவரத்து பாதிக்கப்பட்டது.

தான் பயின்ற அரசுப்பள்ளிக்கு ரூ.1 லட்சத்தில் நலத்திட்ட உதவிகள் வழங்கிய ஆசிரியர்

புதுக்கோட்டை: புதுக்கோட்டை மாவட்டம், ஆலங்குடி அருகே தான் பயின்ற அரசுப்பள்ளிக்கு ரூ.1 லட்சம் மதிப்பிலான நலத்திட்ட உதவிகளை புதன்கிழமை அரசுப்பள்ளி ஆசிரியர் வழங்கினார்.

புதுக்கோட்டை மாவட்டம் ஆலங்குடி  அருகேயுள்ள அரையப்பட்டியைச் சேர்ந்தவர் தி.குணசேகரன். இவர் வல்லத்திராகோட்டை அரசு மேல்நிலைப்பள்ளியில் இயற்பியல் ஆசிரியராகவும், உதவித் தலைமை ஆசிரியராகவும் பணியாற்றி வருகிறார். இவர் அரசுப் பள்ளிகளில் பயிலும் ஏழை, எளிய மாணவர்களுக்கு தொடர்ந்து பல்வேறு உதவிகளைச் செயது வருகிறார். இதற்காக பல்வேறு அமைப்புகள் சார்பில் 22  விருதுகள் வழங்கி அவரை சிறப்பித்துள்ளனர்.
 இந்நிலையில், அரையப்பட்டி அரசு மேல்நிலைப்பள்ளியில் முன்னாள் மாணவரான முறையில் அந்தப்பள்ளியில் படிக்கும் அத்தனை மாணவர்களக்கும் சுமார் 30 ஆயிரம் மதிப்பிலான புத்தகங்களை  ஆசிரியர் குணசேகரன் புதன்கிழமை வழங்கினார். மேலும், ரூ.10 ஆயிரம் மதிப்பிலான மணி ஒலிப்பான், ரூ.15 ஆயிரம் மதிப்பில்  மேசைகள், மாணவர்களுக்கு மாலை நேர சிற்றுண்டிக்கா க ரூ.50 ஆயிரம் என ரூ.1 லட்சம் மதிப்பிலான உதவியை குணசேகரன் வழங்கினார்.

இந்நிகழ்ச்சியில் பெற்றோர் ஆசிரியர் கழகத்தலைவர் எஸ்.ஆர்.வடிவேலு, கல்விக்குழுத் தலைவர் ச.சிங்காரம், பள்ளித் தலைமை ஆசிரியர் பாண்டியன் உள்ளிட்டோர் பங்கேற்றனர்.

ஆம்புலன்ஸ் வர தாமதம்: மகாராஷ்டிராவில் தாய், சேய் மரணம்

மும்பை: மகாராஷ்டிரா மாநிலத்தில் ஆம்புலன்ஸ் வர தாமதமானதால், தாயும் சேயும்  உயிரிழந்த சம்பவம் அதிர்ச்சியை ஏற்படுத்தியுள்ளது.

மகாராஷ்டிரா மாநிலம், பால்கர் மாவட்டம், மோக்டா அருகே அம்லே கிராமத்தை சேர்ந்த சானியா என்பவரின் மனைவி மணிஷா, 7 மாத கர்ப்பமாக இருந்தார். திடீரென மணிஷாவுக்கு பிரசவ வலி ஏற்பட்டது. இதனால் அவரது கணவர் மனைவியை ஆஸ்பத்திரிக்கு அழைத்து செல்ல ஆம்புலன்சை தொடர்பு கொண்டு அழைப்பு விடுத்தார்.

வெகுநேரமாக ஆம்புலன்சு வராததால் சானியா உள்பட 4 பேர் சேர்ந்து போர்வையில் மணிஷாவை தூக்கிக்கொண்டு 3 கி.மீ. தூரத்தில் உள்ள வாடா சாலைக்கு நடந்து வந்தனர். சுமார் 2 மணி நேர காத்திருப்புக்கு பின் வந்த ஆம்புலன்ஸில் மணிஷாவை ஏற்றிக்கொண்டு நாசிக்கில் உள்ள அரசு ஆஸ்பத்திரிக்கு கொண்டு சென்றனர்.

அவருக்கு உடல்நிலை மோசமாக இருந்ததால் டாக்டர்கள் அறுவை சிகிச்சை செய்து குழந்தையை வெளியே எடுத்தனர். ஆனால் குழந்தையின் உயிரை காப்பாற்ற முடியவில்லை. அதன்பின், அதிக ரத்தபோக்கு காரணமாக மணிஷா அடுத்த நாள் காலை சிகிச்சை பலனின்றி உயிரிழந்தார்.ஆம்புலன்ஸ் வாகனம் வர காலதாமதம் ஆனதால் தான் தாயும், குழந்தையும் உயிரிழந்ததாக உறவினர்கள் குற்றஞ்சாட்டினர்.

நடிகர் விஜயுடன் உடன் கிரிக்கெட் வீரர் வருண் சக்கரவர்த்தி சந்திப்பு

சென்னை: விஜய் ரசிகரான வருண் சக்கரவர்த்தி  இந்திய அணியில் தேர்வு செய்யப்பட்டதை அடுத்து நடிகர் விஜயை நேரில் சந்தித்து தனது மகிழ்ச்சியை  பகிர்ந்துகொண்டார் .

விநாயக சதுர்த்தி விழாவை நடத்த கோரி ஈரோட்டில் இந்து முன்னணியினர் கோவில்கள் முன்பு ஆர்ப்பாட்டம்

ஈரோடு, செப்: விநாயகர் சதுர்த்தி விழா வரும் 10- ஆம்ந் தேதி கொண்டாடப்பட உள்ளது. இந்து முன்னணி சார்பில் விநாயகர் சக்தி உள்ள ஒரு வருடம் சிறப்பாக கொண்டாடப்பட்டு வருகிறது. ஈரோடு மாநகர் பகுதி மட்டும் ஆயிரத்திற்கும் மேற்பட்ட இடங்களில் இந்து முன்னணி சார்பில் விநாயகர் சிலைகள் வைக்கப்பட்டு பூஜை செய்யப்பட்டு பின்பு அனைத்து விநாயகர் சிலைகளும் ஊர்வலமாக எடுத்துச் செல்லப்பட்டு, கருங்கல்பாளையம் காவிரி  ஆற்றங்கரையில் கரைக்கப்படும். இந்நிலையில், இந்த ஆண்டு கொரோனா தாக்கம் காரணமாக , பொது இடங்களில், விநாயகர் சிலை வைத்து வழிபடக் கூடாது என அரசு அறிவித்துள்ளது.  இதற்கு இந்து முன்னணியினர் கண்டனம் தெரிவித்து போராட்டங்களை நடத்தி வருகின்றனர்.  விநாயகர் சதுர்த்தி விழாவை நடத்த அனுமதிக்கக் கோரி இன்று தமிழகம் முழுவதும் உள்ள கோவில்களில் முன்பு கண்டன ஆர்ப்பாட்டத்தில் ஈடுபட போவதாக அறிவித்திருந்தனர்.

 அதன்படி, ஈரோடு இந்து முன்னணி சார்பில் பெரிய மாரியம்மன் கோவில் முன்பு விநாயகர் சதுர்த்தி விழா நடைபெற வலியுறுத்தி, சூடம் ஏற்றி வழிபட்டு கண்டன ஆர்ப்பாட்டத்தில் ஈடுபட்டனர். மாவட்ட தலைவர் ஜெகதீசன் தலைமை வகித்தார். மாவட்ட பொதுச்செயலாளர் சக்தி முருகேஷ் முன்னிலை வகித்தார். இதேபோல் திண்டல் வேலாயுதசாமி கோவில் முன்பு இந்து முனனணியினர் கண்டன ஆர்ப்பாட்டத்தில் ஈடுபட்டனர். இதேபோல் மாநகர் பகுதிக்கு உட்பட்ட  பெரியவலசு வீரப்பன்சத்திரம், கருங்கல்பாளையம், கோபி பெருந்துறை சத்தியமங்கலம் என மாவட்டம் முழுவதும் இந்து முன்னணியினர் கோவில் முன்பு கண்டன ஆர்ப்பாட்டத்தில் ஈடுபட்டனர்.